آزربايجان-كوردوستان سينيرلاريني بليرله مه ده كي تمل آليناجاق ايلكه لر

آزربايجان-كوردوستان سينيرلاريني بليرله مه ده كي تمل آليناجاق ايلكه لر

(اصول اساسي در تعيين مرزهاي آزربايجان و كردستان)

گٶزدن گئچيريلميش- ٢٠٠٨

http://kurd-yayilmasi.blogspot.com/

آزربايجان ميللي حؤکومتيˊنين آزربايجان سينيرلاري حاققينداکي دوشونجه و اويقولامالاري تاريخي، ايستيراتئژيک و ميللي باخيمدان يانليش اينانج، ايريمسيزليك (ديققتسيزليك)، بيلگيسيزليك و سيياسي ضعف اوزوندن اورتايا چيخان شئيلردير و بيزي و آزربايجان'ين گله جه ييني باغلاماز، باغلاماماليدير.

ايزله نمه سي گره كه ن تاكتيكلر

آزربايجان و كوردوستان (و فارسيستان، گيلان، لكيستان) آراسينداكي ميللي سينيرلاري بليرله مكده، نهايي بير چٶزومه اولاشماغين ان اٶنه ملي يول و يورداملاريندان بيري، فارس، گيلك، كورد و لك خالقلاري ايله آپاريلان قارشيليقلي دانيشيقلاردير. آنجاق دانيشيقلار بو سورونون چٶزومونده سون آشامالاردان بيريدير، وار اولان يوللارين هاميسي دئييلدير و تك باشينا يا دا ايلك باشدا يارار ساغلاماز حتتا ضررليدير.

ايلك اٶنجه بيز ميللي تورپاقلاريميز و ميللي سينيرلاريميزي اوچ "ائتنودئموقرافيك"، "ژئوايستئراتئژيك" و "ميللي- تاريخي" اوصوللارا داياناراق ياخچيجا بيلمه لي، و بليرله مه ليييك.

سونرا بو اوچونون تركيبيندن ميللي چيخارلاريميزي ان ياخچي بيچيمده قارشيلايابيله ن گونئي آزربايجانˊين ميللي بير يئركيپيني (خريطه سيني) ياراتماليييق. كورد و ائرمني خالقلاري چوخداندير اٶزلرينه بئله بير خريطه تانيملاييبلار.

اوچونجو آشامادا ميللي چيخارلاريميزي يانسيدان و قورويان بو سينير و خريطه ني، بوتون آيدينلاريميز، بيليم آداملاريميز، دونيانين آكادئميك و سيياسي مركزلري و مئدييالاري و خالقيميز آراسيندا يايماليييق. بونو ايندي كوردلر ائله ييرلر و ائرمني لر ده اون ايللر بوندان قاباق ائديبلر.

ان سون آشامادا ايسه گله جكده كوردلرله ميز داليندا اوتوراندا، دانيشيقلار، چنه وورماقلار، تهديدلر، تطميعلر، ديپلوماسي و باشقا سيياسي آراج و مانئورالارلا يوخاريدا بليرله ديييميز ميللي سينيرلاريميزا لاپ ياخين اولاني الده ائتمه يه، گونئي آزربايجان دٶولتي سينيرلاري ايچينه قاتماغا چاليشماقدير.

آزربايجان دئموکرات فيرقه سيˊنين يانليشلاري

گئچه نلرده آچيق نئت سايتيندا بير سيرا كورد قوروپلارين آزربايجان توپراقلاري اوزه رينده ائتديكلري ايدديعالارلا ايلگيلي ياييلان آشاغيداکي يازي، هم زامانلاما باخيميندان يئرينده و هم ده ايچه ريک آچيسيندان -بير ايکي نؤکته ديشيندا- منطيقلي و دوغرو تمللر اوزه رينده قورولموش اويقون بير يانيتدير. فورصتي قوللاناراق اوز آديما اونو حاضيرلايانلاردان تشککور ائديره م.

نامه سرگشاده به احزاب وسازمان های کرد ایرانی
http://kurd-yayilmasi.blogspot.com/2006/03/blog-post_114305472773271787.html

يوخاريدا دئديييم بير ايکي نٶکته ايسه بونلاردان عيبارتدير:

يازينين ان تمل سورونو، کورد-تورک و آزربايجان-کوردوستان سينيرلاري و سرحدلرينين بليرله نمه سينده ايزله نمه سي گره كه ن يٶنته ملرله ايلگيليدير. يازيدا بو يٶنته ملرين آزربايجان ميللي حٶکومتي و کوردوستان دٶولتينين آرالاريندا ايزباسديقلاري (ايمضالاديقلاري) آنلاشمانين روحونونا باغلي قالماق اولدوغو يازيلير.

آ- اگر بو "روح"دان آماج، دانيشيقلار ياپماق و دييالوقسا، بو بوتونويله قبول ائديله بيله جک و هر ايکي طرفين چيخارينا اولان بير يٶنته مدير.

ب- اگر بو "روح"دان آماج، آنيلان ايکي دٶولت آراسيندا ياپيلان آنلاشمالارين اٶزو ايسه، بو هئچ بير شکيلده قبول ائديله جک بير روح دئييلدير و بوتونويله تورک خالقي و آزربايجان`ين ميللي چيخارلارينا ترسدير.

آزربايجان ميللي حٶكومتي و كوردوستان دٶولتي آراسينداكي سينيرلارلا ايلگيلي ياپيلان آنلاشمالار سورونلو آنلاشمالاردير. او آنلاشمالاردا وار اولان اساس سورون، ائتنيک و ژئوسيياسي آزربايجان يئرينه، پهلوي دٶولتينين ايستئعماري يٶنه تگيلري (سيياستلري) دوغرولتوسوندا ياراديلان قوندارما ايداري تقسيماتين اساس آلينماسيدير. آزربايجان ميللي حٶكومتينين، آزربايجانين تورپاق بوتونلويونه ترس اولان بو يانليش ايداري تقسيماتي قبول ائتمه سي سونوجوندادير كي آزربايجانˊين گٶز ببه يي ساييلان سولدوز'وموزن، کوردوستان دٶولتينه داخيل ائديلمه سي كيمي تاريخي بير يانليشليغا تانيق اولوروق. بو قونودا آشاغيداکي ايلگيلي يازيلارا باخابيله رسينيز:

سلدوز ترك را جزو جمهوري كردستان كردند
http://kurd-yayilmasi.blogspot.com/2006/03/1320-1301-1320.html
راديو بي بي سي: اروميه و سلدوز مزاحم آرمان كردستان هستند
http://kurd-yayilmasi.blogspot.com/2006/03/blog-post_114330816335996702.html

آزربايجان دئموکرات فيرقه سيˊنين صاحيب اولدوغو يانليش آزربايجان تصووورو- كي آزربايجانˊين جوغرافيياسي، تاريخي و تاريخي جوغرافيياسينا، آزربايجانˊين ژئوايستئراتئژيك چيخارلارينا يئته رينجه تانيش اولماماسي، پهلوي ديکتاسينين قوندارما ايداري تقسيماتيني سورقولامادان و گٶزو باغلي قبول ائتمه سي و سووئت دٶولتينين زورلاماسي ايله اورتايا چيخميشدير- هئچ بير شکيلده بوگون اوچون گئچه رلي اولابيلمه ز. بو اٶلومجول سيياسي خطا و يانليشليق - ان باشدا آزربايجان`ين سولدوز، تيکان تپه، سايين قالا، .... بٶلگه لرينده ياشايان تورک خالقينا ايهانتدير و قبول ائديلمه زدير.

آزربايجان دئموکرات فيرقه سيˊنين يانليش آزربايجان تصوورو تكجه باتي آزربايجانˊا قيسيتلي (محدود) قالماييبدير. بو حٶكومت عئيني يانليشليغي، آزربايجانˊين ان وارسيل (زنگين) يئر آلتي ارگه نه لرينين (معدنلرينين) يئرله شدييي، و آزربايجان تورپاغي اولدوقلاري حالدا، ايداري تقسيماتدا كوردوستان و كيرمانشاهان اوستانلارينا باغلانان بيجار-گروس، ياسسو کند، قوروه، سونقور، .... باره سينده ده ائله ييبدير. اٶته کي ياندان عئيني يانليشليق گينه ده آزربايجانˊين گونئي دوغوسوندا فارسيستانˊا بيتيشيك تورپاقلاريميز حاققيندا تئكرارلانيب و سونوجدا آزربايجان`ين ياريسيندان چوخونو اولوشدوران تورپاقلاريميز -بوگونکو زنجان، همدان، قزوين، تئهران، قوم و مرکزي اوستانلاري- آزربايجان`ين ديشيندا قبول ائديله ره ك فارسيستان-مرکزي دٶولته بيراخيليبدير.

باشقا بير دئييشله آزربايجان ميللي حٶکومتيˊنين آزربايجان سينيرلاري (سرحدلري) حاققينداکي دوشونجه و اويقولامالاري، تاريخي، ايستيراتئژيک و ميللي باخيمدان يانليش اينانج، ايريمسيزليك (ديققتسيزليك)، بيلگيسيزليك و سيياسي ضعف اوزوندن اورتايا چيخان شئيلردير. بو يانليش دوشونجه لر تملينده ياپيلان آنلاشمالار ايسه ميللي چيخارلاريميزا ترس دوشدوكلريندن اٶتورو، بيزي و آزربايجانˊين گله جه ييني باغلاماز.

تاريخي-دئموقرافيک اوصوللار

من بورادا قيسساجا فئدئرال آزربايجان و کوردوستان`ين ميللي سينيرلاري و دٶولت سرحدلريني بليرله مه ده واز گئچيلمه ز اولان ايلكه لري (اساسلاري) سيرالاييرام:

١- گنه ل ايلكه: سينيرلارين بليرله نمه سينده اساس، ياشايان خالقدير

ايران`ين قوزئي باتيسينداكي بوتون تورک يئرله شيم بٶلگه لري آزربايجان'ا و ايران`ين قوزئي باتيسينداكي بوتون کورد يئرله شيم بٶلگه لري کوردوستان'ا – آشاغيداكي قئيدلر گٶز اٶنونه آليناراق- داخيل ائديلمه ليدير.

ايلك اٶنجه بيز اٶزوموز بونا اينانمالييق. بورايا كوردوستان و كيرمانشاه و باتي آزربايجان اوستانينداكي سون يوز ايلده كوردله شه ن (و مركزي، تئهران، قوم، همدان، قزوين و ... اوستانلارينداكي فارسلاشان) بوتون تورك و آزربايجان تورپاقلاري دا اٶزه لليكله داخيلدير.

٢- سينيرلارين چيزيلمه سينده تمل آليناجاق زامان كسيدي ١٩٠٦ اٶنجه سيدير

بير بٶلگه نين تورك اولوب اولماماسيني بليرله مه ده كي اساس آليناجاق زامان کسيدي و ايلايگون (تاريخ)، اينديکي ائتنودئموقرافيک دوروم دئييل، ١٩٠٦ ايليندن قاباقکي ائتنيک وضعيييتدير. ١٩٠٦ تاريخي، مشروطييت اينقيلابينين باشاريسيزليغا اوغراماسي و فارس شووئنيسمينين ايران دٶولتي و بوروکراسيسينه حاکيم اولدوغو تاريخدير. بو تاريخدن سونرا ميللي- ائتنيک بٶلگه لرينين ترکيبينده گرچکله شه ن بوتون ده ييشيکلر (تورکييه و ايرانين باشقا بٶلگه لريندن آزربايجان`ا گليب بورايا يئرله شديريله ن کوچه ري کورد طايفالاري؛ بٶيوک شهه رلر،... اورمو و بنزه رلرينه ياپيلان کورد کٶچ و آخينلاري سونوجوندا بورالاردا كوردلرين ساييسينين آرتماسي؛ كوردلرين لهينه اورتايا چيخان دئموقرافيك ده ييشيكليكلرو....)، کولونييال ده ييشيکليکلر اولوب، هئچ واخت ميللي- ائتنيک بٶلگه لرين و فئدئرال دٶولتلرين سرحدلريني بليرله مه ده (تعيين ائتمه ده) اساس آلينابيلمه ز. بو كوردلرين بورالاردا ياشاماسي، بورالارين كوردوستان اولدوغو آنلامينا گلمه ز، بلكه بونلار تكجه آزربايجان تورپاقلاريندا ياشايان كوردلرديرلر.

آزربايجان تورپاقلاريندا ١٩٠٦دان سونرا اولوشموش هر هانسي کورد يئرله شيم بٶلگه سي- شهه ر يا دا کند فرق ائتمه ز- بوگون يوزده يوز کورد اولسا دا، گينه آزربايجان`ا داخيل ائديلمه ليدير. عراق`دا كورد اٶنده رلر بارزاني و طاليباني، کورد بٶلگه سي و اٶزه لليكله (خوصوصن) كورد بٶلگه سينين ديشيندا قالان، توركمان شهه ريميز اولان کرکوک'ون ايستاتوسونو بليرله مک اوچون، بعث رئژيمين قورولماسيندان قاباقکي وضعيييتين اساس آلينماسي، حتتا بو تاريخدن سونرا بٶلگه يه کوچ ائده ن و يا يئرله شديريله ن عربلرين بئله، بو تورپاقلاردان ائشييه آتيلماسيني مودافيعه ائديرلر. بيز ده بو تجروبه دن درس آلاراق، آزربايجان`ا ١٩٠٦ ايليندن سونرا تورکييه، عراق و يا ايران`ين باشقا بٶلگه لريندن ياپيلان کورد کٶچلرينين، آزربايجان`ين ميللي سرحدلريني بليرله مه ده هئچ بير ائتگيسي (تاثيري) اولماياجاغيني ساوونماليييق.

بير داها وورقولاماقدا يارار واردير: ايران´ين قوزئي باتيسيندا ١٩٠٦دان قاباق، توركلرله مسكون اولان بوتون بٶلگه لر، بوگون كورد، فارس و يا باشقالاري ايله مسكون اولسالار دا، بوگون ايسته ر تئهران اوستانينا، ايسته رسه ده كوردوستان اوستانينا داخيل ائديلميش اولسالار دا، موطلق شكيلده آزربايجان سرحدلري و مرزلري ايچينده قالماليدير.

٣- اورمو-سولدوز مئحورينين ياشامسال (حياتي) اٶنه مي:

پهلوي دٶنه مينده، اورمو گٶلونون گونئيينده کيچيک بير بٶلگه ساوجبولاق (ماهاباد) شهريستانينا باغيشلانيب و بئلجه اورمو ايله سولدوز آراسيندا قوپوقلوق اولوشدورولوبدور. بو يوللا بير طرفدن کوردلره اورمو گٶلونه چيخيش يولو ساغلانيب، بير طرفدن ده سولدوز- تيکان تپه- سايين قالا حتتا بيجار و... گله جکده کورد ايشغالي قاباغيندا ساوونماسيز بيراخيليبدير.

اورمو-سولدوز مئحوري، گونئي آزربايجان`ين باتي (غربي سرحدلريني قوروماقدا ياشامسال (حياتي) اٶنمه صاحيبدير. بو مئحورده هر هانسي قوپوقلوق، قوزئيده اورمو- سالماس- خوي- چالديران- ماکي'نين و گونئيده سولدوز- تيکان تپه- سايين قالا- بيجار- ياسو کند- قوروه- سونقور'ون دوشمه سي و راحاتليقلا کوردوستانا ايلحاق ائديلمه سي دئمکدير. بو ندنله، اورمو گٶلونون گونئيينده ماهاباد شهريستانينا داخيل ائديلميش ١٩٠٦'دان قاباقکي بوتون تورک بٶلگه لري- اينديکي ائتنيک ترکيبلري نه اولورسا اولسون – فئدئرال آزربايجان`ا عاييددير.

باشقا بير دئييشله هئچ بير قوشول (شرط) آلتيندا اورمو- محممديار- سولدوز آراسيندا قوپوقلوغا تابقي (ايذين) وئريلمه مه ليدير. ائتنيک ويا فئدئرال کوردوستان`ين اورمو گٶلونه چيخيشي يوخدور و اولماياجاقدير.

٤- كوردوستان و كيرمانشاهان اوستانلارينداكي آزربايجان تورپاقلاري، آزربايجان`ا ايلحاق ائديلمه ليدير:

پهلويلر دٶنه ميندن باشلاياراق، ائتنيک آزربايجان`ين بيجار، قوروه و سونقور بٶلگه لري کوردوستان و کيرمانشاهان اوستانلارينا داخيل ائديليب، بورايا بير طرفدن بٶيوک کورد كٶچو و گيريشي گرچکله شيب، بير طرفدن ده بورانين يئرلي تورک اهاليسي، زنجان، همدان و غربي آزربايجان اوستانلارينا كٶچ (موهاجيرت) ائديب و ائديرلر.

آزربايجان و کوردوستان سينيرلاريني تارتيشاندا (موباحيثه ائده) نده هميشه بيجار، قوروه و سونقورداکي تورک بٶلگه لرينين - يعني ١٩٠٦دان قاباق توركلرله مسكون اولان بٶلگه لرين، بوگون كوردلرله مسكون اولسالار بئله- موطلقن آزربايجان`ا داخيل ائديلمه سي وورقولانماليدير. هارانين تورک بٶلگه سي اولدوغونو تثبيت ائده نده ده- يوخاريدا آچيقلانديغي تكين- بوگونکو ائتنيك-ائموقرافيك دوروم (وضعيييت) دئييل، ١٩٠٦'دان قاباقکي جمعيييتين ائتنيک ياپيسي (ترکيبي) گٶز اٶنونده (نظرده) آلينماليدير.

غربي آزربايجانداکي بوكان، ماهاباد (ساووجبولاق) و سردشت شهريستانلارينداكي بير سيرا کورد يئرله شيم مرکزلرينين فئدئرال کوردوستان`ا باغلانابيلمه سي، حتتا بو قونونون (مووضونون) تارتيشيلمايا آچيلمابيلمه سي (موباحيثه ائديله بيلمه سي)، آنجاق و يالنيز ١٩٠٦دان قاباق توركلرله مسكون اولان بيجار، قوروه و سونقور كيمي بٶلگه لرين، داها اٶنجه دن فئدئرال آزربايجان`ا باغلانماسينا مشروطدور.

باشقا بير دئييشله فئدئرال كوردوستانˊدا توركلرله مسكون اولان بير قاريش تورپاق دا قالماماليدير. بونا گٶره فئدئرال ايرانˊين كوردوستانˊدا ياشايان آزربايجانليلار و توركلردن دانيشماق اولماز (بٶيوك كورد شهه رلرينه كٶچ ائده نلر خاريج). چونكو تورك و آزربايجان تورپاقلاري كوردوستان و كيرمانشاهان اوستانلاريندان آيريليب و آزربايجانا يئنيدن ايلحاق ائديلمه ليدير، و ائديله جكدير. و كوردوستاندا ان كيچيك تورك تورپاغي بئله قالماياجاقدير.

سيياسي ايستيراتئژيک اساسلار

يوخاريداکي تاريخي دئموقرافيک اوصوللاردان باشقا، آزربايجان-کوردوستان فئدئرال دٶولتلرين سرحدلريني تعيين ائتمكده سيياسي ايستيراتئژيک اساسلار دا رول اوينايير.

٥- سيياسي-امنييتي ايلكه لر: گونئي آزربايجانˊين توركييه يه بيتيشيكليك گره يي

آزربايجان -تورکييه آراسيندا جوغرافي بير سد ويا آرا-قوپوقلوغون (فاصيله) يارانماماسي، آزربايجان و تورک خالقينين ايستيراتئژيک چيخارلاري و اٶزه لليكله (خوصوصييله) گله جكده كي کورد و مرکزي فارس-فارسيستان دٶولتلري، و حتتا ائرمنيستان قارشيسيندا گووه نلييينين (امنيييتينين) ساغلانماسي اوچون ياشامسال (حياتي) اٶنه مه صاحيبدير. باشقا بير دئييشله، اگر تورکييه- ايران سينير بويوندا ١٩٠٦دان قاباق دا بير سيرا کورد بٶلگه لري مووجود اولموش اولسا دخي- کي بئله بير شئيين اولدوغوندان آرخايين دئييله م- کوردلرله مسکون بئله نچي يئرله شيم بٶلگه لري، گينه ده هئچ بير شرطينه ن، کوردوستان دٶولتينه داخيل ائديله بيلمه ز.

ايراندا ائتنيک ويا فئدئرال کوردوستان`ين تورکييه ايله اورتاق سينيري (سرحددي) يوخدور و اولماياجاقدير. ايرانين قوزئي باتيسيندا (شيمال غربينده)، تورکييه نين بوتون سينير بويو تک قونشوسو آزربايجان اولماليدير.

٦- اوشنو (اشنويه)، آزربايجان`ين عراق`ا آچيلان قاپيسيدير:

اسکيدن تورکلرله مسکون اولان اوشنو و خانا (پيرانشهر) شهريستانلاري، آزربايجان`ي عراق`ا - و بو وسيله ايله اورادا ياشايان و کورد ياييلماچيليغي و ظولمونه معروض قالان تورکمان اوجقاراوباميزا (ديياسپوراميزا)- و عرب دونياسينا باغلايان تک گئچيددير. بو ندنله اوشنو (اشنويه) اينديکي ائتنيک ترکيبي نه اولورسا اولسون، موطلقن فئدئرال آزربايجان سرحدلري ايچينده قالاجاقدير.

باشقا بير دئييشله، ائتنيک ويا فئدئرال آزربايجان و عراق`ين، شرطلر نه اولورسا اولسون، اورتاق سرحددي اولماليدير.

٧- كوردوستاندان قاچان توركلر سورونو گونده مه گتيريلمه ليدير:

گونوموزده کوردلرله مسکون اولان ساووج بولاق (ماهاباد)، خانا (پيرانشهر)، ساققيز، اوشنو (اشنويه)، بانا (بانه) و.... شهريستانلاريندا ياشايان تورکلر، ١٩٠٦ تاريخيندن سونرا بير نئچه مرحله ده، باشدا کوردلرين باسقي و سالديريلارينا معروض قالديقلارينا گٶره اٶز تاريخي يورد يووالاريني ترک ائتميش و اورالادان قاچميشلار. بو قاچيش اٶزه لليكله اينقيلابدان سونرا داها يئيين (شيددتلي) و تركين (سورعتلي) اولوب و بٶلگه ده کي اونلارجا تورک کندي بوشالديليبدير. حالبوکي بو دٶنه مده آزربايجاندا ياشايان هئچ بير کورد، بورادان ائتنيك کوردوستان`ا گئري قاييتماييبدير. باشقا دئييشله سون يوز ايلده كوردلرين ياشاديغي بٶلگه لردن توركلرين چيخيشي و توركلرين ياشاديغي بٶلگه لره كوردلرين گيريشينه تانيق اولماقداييق.

آزربايجان و کوردوستان سينيرلاريني (سرحدلريني) تارتيشاندا (موباحيثه ائده نده) کٶچ –قاچماغا مجبور ائديله ن بو کوردوستان تورکلرينين (خانا، ساققيز، ساووجبولاق،....) گونده مه گتيريلمه ليدير. بونلارين کوردوستان`ا قاييتمالاري، کوردوستان فئدئرال دٶولتي طرفيندن ماددي (تورپاق، مال-داوار) ضررلرينين قارشيلانماسي، قاييتمالاري مومکون دئييلسه ده اونلارين ساييسي قده ر کورد`ون (ويا کورد يئرله شيم مرکزلرينين) آزربايجان تورپاقلارينا داخيل ائديلمه سي شرط قوشولماليدير.

٨- تبريز و اردبيل آكتيويستلري و كورد مساله سي:

آزربايجان`ين کوردوستانلا اولان اورتاق غربي سرحدلري و عوموميييتله کورد-تورک مساله سي حاققيندا فيکير سٶيله يه نلر گنه لليکله دوغو (شرقي) آزربايجان و اردبيل اوستانلاريندانديرلار. البتته بو اٶزلويونده پيس بير شئي دئييلدير، حتتا لاپ ترسينه چوخ گره کلي و سئوينديريجي بير دورومدور. آمما تجروبه گٶسته رميشدير کي بو يوردداشلاريميز تورک-کورد و آزربايجان-کوردوستان مساله سينه دريندن و هر طرفلي بلد دئييلديرلر.

بو اوزدن بو مساله لر حاققيندا موطلق شکيلده يئرلي اهاليدن اولان آيدين و چاباچيلاريميز (آکتيويستلريميز) - و اٶنجه ليکله باتي آزربايجان (اورمو، سولدوز، تيكان تپه، ماكي، سالماس، سايين قالا، ...)، کوردوستان (بيجار، قوروه، ياسسو کند، سونقور...) و همدان (باهار، اسداباد، كبودرآهنگ، تويسركان....) سٶز صاحيبي اولمالي و اٶن پيلانا چيخماليديرلار.